Gipalig-on sa Task Force Davao ang seguridad sa tanang dagkong entry points sa syudad sa Davao subay sa umaabot nga summer season ug eleksyon.
Sumala ni Major Ronnel Avanzado, ang tigpamaba sa Task Force Davao, tumong niini nga masiguro ang luwas ug malinawon nga pagpanginabuhi sa mga residente ug turista nga mibisita sa syudad karong ting-init.
Gipahayag ni Avanzado nga ang pagtaas sa inspeksyon sa mga sakyanan ug pasahero sa mga checkpoint kabahin sa mas hugot nga pagbantay sa panahon sa taas nga biyahe ug kadaghan sa mga molugsong sa Davao.
Nangayo sab siya og kooperasyon ug pagsabot sa katawhan nga mosulod sa syudad samtang ilang ginapatuman ang “culture of security.” Dugang pa sa opisyal nga andam na ang ilang pwersa alang sa seguridad sa eleksyon, nga ilang gihimo uban sa Davao City Police Office, og uban pang ahensya sa gobyerno, ug sa Commission on Elections (COMELEC).
Bisan pa sa mas hugot nga seguridad, giklaro ni Avanzado nga wala pay bisan unsang hulga nga namonitor sa mga barangay sa Davao City. Nangayo usab siya sa suporta sa publiko nga magmatngon ug mo-report sa mga kadudahang lihok aron mapadayon ang kalinaw ug kaayohan sa syudad sa tibuok ting-init ug panahon sa eleksyon.
