Gipakusgan sa City Government of Davao ug Integrated Bar of the Philippines (IBP)-Davao City Chapter ang ilang panag-uban aron mapalapdan ang libreng legal nga serbisyo para sa mga kabus nga Dabawenyo.
Kini human sa pagpirma sa Memorandum of Agreement alang sa Extended Legal Aid Program nga nagtumong sa mas lawom ug lapad nga legal assistance.
Pinaagi sa maong programa, magkuha og dugang mga abogado ang IBP nga mututok sa mga kaso nga dili na matabangan sa Public Attorney’s Office (PAO) o City Prosecutor tungod sa conflict of interest.
Siguradong adunay motabang sa mga residente nga walay ikabayad sa abogado, ilabi na sa mga komplikado nga kaso nga nagkinahanglan og legal nga representasyon.
Gisuportahan kini og pondo nga kapin P2 milyon matag tuig nga igahin sa Davao City Government aron masustentohan ang serbisyo.
Matod ni Mayor Sebastian “Baste” Duterte, daghang Dabawenyo ang nagreklamo sa barangay caravans kabahin sa kakulang sa access sa legal services, ug kini nga inisyatibo usa ka tubag aron mas mapaduol ang hustisya sa katawhan.
