Gipahibalo sa Department of Education (DepEd)-Davao Region nga kapin 12,400 ka mga magtutudlo ang ipakatag aron magsilbi sa umaabot nga 2025 local ug national midterm elections. Kini gikompirma ni DepEd-Davao spokesperson Jenielito “Dodong” Atillo sa Davao Peace and Security Press Corps meeting niadtong Abril 23, 2025. Sa nasangpit nga ihap, 11,132 ka magtutudlo ang mamahimong Electoral Boards (EBs), 1,136 isip DepEd Supervising Officials (Deso), ug 143 kabahin sa Barangay Board of Canvassers (BBOC).
Gitumbok ni Atillo nga ang deployment mokabat sa tanang division sa rehiyon, lakip na ang Davao City, Davao de Oro, Davao del Norte, Davao del Sur, Davao Occidental, Davao Oriental, ug mga syudad sama sa Digos, Samal, Mati, Panabo, ug Tagum. Giawhag sab niya ang publiko nga ipakita ang tukmang respeto sa mga magtutudlo nga magserbisyo isip electoral boards, ilabi na kay aduna sila’y gahum nga mohimo og angay nga aksyon subay sa polisiya sa eleksyon.
Dugang pa, gipasabot ni Atillo nga karong eleksyon, ang mga magtutudlo adunay pagapilian nga modawat o mobalibad sa serbisyo, labi na kung aduna silay political affiliation. Sa pagsuporta sa mga magtutudlo, mipirma ang DepEd ug Integrated Bar of the Philippines (IBP) og kasabutan aron protektahan sila sa legalmente. Samtang, gipahibalo usab ang pagtaas sa honoraria nga ihatag sa mga magserbisyo diin makadawat sila og P12,000 alang sa chairman, P11,000 sa mga miyembro, ug P8,000 ngadto sa support staff, lakip na ang paghatag og lima ka adlaw nga service credits sa tanang teaching ug non-teaching personnel.
