Subling mubalik sa The Hague si VP Sara Duterte sa mosunod nga bulan aron bisitahon ang nabilanggo niining amahan nga si kanhi Pangulong Rodrigo Duterte.
Matod sa ikaduhang pangulo, gusto niining bisitahon ang amahan sa adlawng natawhan niini karong Mayo 31. Plano usab sa nahisgutan nga makauban niini ang iyang inahan ug kanhi asawa sa kanhi pangulo nga si Elizabeth Zimmerman.
Matod pa ni VP Sara, una na niining gisaad sa iyahang inahan ug amahan nga magkauban silang tanan sa adlawng natawhan niini.
Gusto kuno niining i-uban ang inahan sa sunod nga pagbisita gumikan kay wala kini nakakuha ug permission kaniadto, aron makasulod sa detention facility nga nahimutangan sa kanhi pangulo.
Dugang pa niini nga kaniadtong gihinabi kini sa iyang amahan, nahisgutan kuno niini nga gihulat niya ang pagbisita ni Zimmerman, hinungdan nga gipaneguro sa ikaduhang pangulo nga mahitabo kini sa nagkaduol niining adlawng natawhan.
