Misaka ang Ekonomiya sa Davao Region og 6.3% sa 2024, subay sa gipaguwa nga PSA Report.
Misaka og 6.3% ang ekonomiya sa Davao Region niadtong 2024, adunay gamay nga pagkunhod kung itandi sa 6.7% nga pagtubo niadtong 2023, base usab sa datos nga gipagula sa Philippine Statistics Authority (PSA)–Davao.
Sa usa ka briefing nga gihimo kagahapong adlawa sa usa ka hotel ning dakbayan sa Bonifacio St.gireport ni PSA Regional Director Randolph Anthony Gales nga ang Gross Regional Domestic Product (GRDP) sa rehiyon misaka ngadto sa ₱1.08 trilyon.
Bisan pa sa gamay nga paghinay sa rate sa pagtubo, misaka ang ranking sa Davao gikan sa ika-5 ngadto na sa ika-4 nga labing kusog nga nagtubo nga rehiyonal nga ekonomiya sa tibuok nasud.
Napabilin usab ang Davao isip ika-5 nga labing dako nga ekonomiya nga adunay 4.9% kontribusyon sa national GDP. Ang top-performing industries sa rehiyon mao ang: Construction – 15.5%, Transportation and Storage – 10.5%, Professional and Business Services – 10.3%, Ang per capita GRDP misaka ngadto sa ₱198,558, nga 5.3% nga pagsaka kung itandi sa 2023.
Nagpabilin ang services sector isip kinadak-ang kontribyutor sa ekonomiya, nga naglangkob sa 61.1% sa kinatibuk-ang GRDP sa rehiyon.
Gipresentar ni Gales, nga Officer-in-Charge ug Regional Director sa PSA-Davao, ang 2024 Economic Performance sa Davao Region atol sa maong kalihokan.
