Nakumpiska sa kapulisan sa Police Regional Office 11 (PRO11) ang kapin P6 milyones nga kantidad sa ilegal nga droga gikan Abril 7 hangtod 13 ning tuiga. Ang maong lakang kabahin sa padayon nga kampanya sa rehiyon batok sa ilegal nga droga aron maprotektahan ang komunidad gikan sa dala nga kadaot niini.
Sa maong semanaha, 88 ka anti-drug operations ang gilusad sa PRO11, lakip na ang buy-bust operations, checkpoints, ug pagpahamtang og arrest ug search warrants. Resulta niini ang pagkadakop sa 106 ka mga suspetsado sa droga, diin 26 kanila giilang high-value targets samtang 80 ang street-level individuals.
Sa tibuok operasyon, 886.0602 gramos sa shabu ang nasakmit nga nagkantidad og P6,025,209.36, samtang 19.904 gramos nga uga nga dahon sa marijuana ang nakumpiska nga nagkantidad og P2,388.48. Nakahulbot usab og 11 ka tanom sa marijuana nga gibanabana nga nagkantidad og P2,200. Pinakataas ang na-record nga operasyon sa Davao City Police Office (DCPO) nga adunay 37 ka operasyon, gisundan sa Davao del Norte ug Davao Oriental police offices.
Matud ni PBGEN LEON VICTOR Z. ROSETE, Regional Director sa PRO11, ang maong mga resulta timailhan sa lig-on nga determinasyon sa kapulisan ubos sa giya ni Chief PNP PGEN ROMMEL FRANCISCO D. MARBIL. Gihangyo usab sa kapulisan ang publiko nga padayon nga mosuporta ug motaho sa mga kadudahang lihok aron mapalig-on ang kampanya batok sa ilegal nga droga.
