Giatubang na si kanhi Pangulong Rodrigo Duterte sa International Criminal Court (ICC) kagahapong adlawa, human sa pipila ka adlaw nga wala kini nakita ang iyahang hulagway sa publiko.
Ang maong pagdungog, usa pa lamang ka pre-trial diin ang maong lakang maoy ipresenta pa niini ang kaugalingon ug ang gikalambigitan niining kaso sa kanhi Pangulo ug pipila ka mga manipestasyon.
Gibutyag sab ni kanhi Executive Secretary Salvador Medialdea nga usa ka kidnapping ang nahitabo sa pagdakop kang FPRRD, gumikan wala sumala pa nahasubay ang tukmang proseso sa pag-aresto.
Lakip sab sa gihisgutan ni Medialdea sa iyahang manipestasyon ang kahimtang sa panglawas ni Duterte ug ang katigulangon na niini.
Wala sab makalikay ang pipila ka mga netizen nga mabalaka ug naguol samtang nag lantaw kini ngadto kang FPRRD human nga mabantayan niini nga daw naglisod sa pag istorya ang kanhi Pangulo samtang mitubag kini sa mga pangutana sa ICC.
Magpadayon ang sunod nga pagdungog sa ICC sa mga criminal charges nga gikaatubang ni Duterte karung umalabot nga bulan sa Setyembre 23, ning tuig kasamtangan.
