Andam na nga ablihan sa City Government of Davao pinaagi sa City Environment and Natural Resources Office (CENRO) ang Roxas Greenway Park sa Roxas Avenue sulod sa unang quarter ning tuiga.
Sumala pa ni Engr. Juancho Dagasohan, labaw sa CENRO Parks and Playground Division, padayon ang paghuman sa finishing touches sa parke.
Adunay usab physical fitness area, ornamental plants, ug daghang punoan nga maghatag og presko ug relaks nga palibot alang sa mga Dabawenyo.
Gisugdan ang renovation sa parke kaniadtong ulahing quarter sa 2024 ug nahuman kini sa kataposan nga bahin sa tuig.
Gikatakda usab nga ayuhon karong tuiga ang People’s Park isip kabahin sa padayon nga pagpalambo sa mga open spaces sa dakbayan.
Nagapadayon usab ang koordinasyon sa City Planning and Development Office (CPDO) ug Task Force on the Inventory of Real Properties of the City Government of Davao (REFTAF) aron makadugang og mas daghang open spaces alang sa parke, nga gilangkoban sa importante nga bahin sa usa ka nagadebelop nga dakbayan.
Giawhag sa CENRO ang mga Dabawenyo nga mobisita ug magpahimulos sa bag-ong parke alang sa ilang kahupayan ug kalingawan.
