Magpahigayon ang Davao City Police Office kon DCPO og mas strikto nga monitoring sa mga menor de edad sulod sa mga hotel, inns, ug uban pang mga establisemento karong adlawa, alang sa selebrasyon sa Valentine’s Day.
Sumala pa ni Acting DCPO Director PCol. Hansel Marantan, nga kini usa ka lakang aron ipatuman ang Republic Act 7610, nga nailhan usab nga “Special Protection of Children Against Abuse, Exploitation, and Discrimination Act”, nga ang bisan kinsa nga masakpan nga naglapas niini nga balaod, lakip na ang mga namugos o ang mitabang sa mga menor de edad nga makasulod sa gihisgutan nga mga establisemento, mag-atubang og tukmang kaso.
Lakip usab ang mga establisemento nga magtugot sa mga menor de edad nga mag-check in nga walay sakto nga ‘guardianship’ mamahimong panubagon usab sa balaod.
Gihangyo sa opisyal ang publiko nga magbantay ug dali nga itaho ang bisan unsa nga makaduda nga kalihokan nga naglakip sa mga menor de edad.
Dugang pa niini, nga ang mga ginikanan ug guardians kinahanglan usab nga magbantay ug magpatuman og strikto nga pagmando sa kalihokan sa ilang mga anak aron malikayan nga malambigit kini sa mga delikadong sitwasyon.
Sumala pa sa opisyal, nga ang pagpanalipod sa kabatan-onan usa ka responsibilidad, ug kinahanglan magtinabangay aron maprotektahan ang ilang kaluwasan ug kaayohan.
