Mukabat sumala pa ngadto sa 820 ka mga natigayong sunog nga natala dinhi sa dakbayan sa Davao.
Kana subay na usab sa datos nga nakalap gikan sa Davao City Fire Districts , sukad niadtong bulan sa Enero hangtod ning Bulan sa Disyembre ning tuig 2024.
Sumala pa sa maong impormasyon, nasayran nga ang bulan sa Abril, maoy ginakonsiderang adunay pinakadaghang ihap nga natala nga mga sunog diin mikabat matud pa kini sa 135 ka mga insidente.
Gisundan sab kini sa bulan sa Marso, nga mukabat sab sa 124, sa Mayo nga 80 ka mga insidente nga adunay kalabutan sa sunog, sa Setyembre nga adunay 71, sa Oktubre sab nga adunay 69, niadtong Enero nga adunay 64, bulan sa Agosto nga adunay 57, sa Nobyembre nga adunay 56, Hunyo ug Hulyo nga adunay susamang ihap nga 50, sa Pebrero nga adunay 48, ug ning bulana, bulan sa Disyembre nga adunay 16 lamang ka ihap sa mga natigayong sunog, diin maoy pinakaubos nga ihap sa insidente sa sunog matag bulan.
Dugang pahimangno na lamang sa mga sakop sa Davao City Fire District ngadto sa publiko, nga kanunay gayud nga sutaon ang mga linya sa kuryente, lakip na sab ang mga gamit niini sa panimalay, labi na nga karong kapaskohan, aron nga malikayan ang mga posibleng sunog nga matigayon.
