Hugot nga gikontra sa Philippine National Police (PNP) ang gipahayag ni kanhi Pangulong Rodrigo Duterte nga wala kunoy mga pulis ang napasagdan ubos sa nakalabayng administrasyon niini.
Ang mga pulis nga gihisgutan sa kanhi pangulo ang nahilakip sa mga operasyon batok sa iligal nga droga ubos sa war on drugs niini. Matod pa sa PNP, dili tinuod ang nahimong pahayag ni Duterte subay na usab sa mga datos nga ilahang gikatala.
Sa kamatuoran, subay sa datos sa Directorate for Personnel and Records Management, mosobra sa 1,000 ka mga pulis ang nag-inusarang giatubang ang mga kasong gipasaka batok sa ilaha gumikan lamang sa pagsunod sa mandato kaniadto sa Duterte administration.
Nasamdan usab sa mga gikasang operasyon kaniadto ang mukabat sa 975 ka mga pulis samtang 300 ka mga pulis ang gikasuhan gumikan sa pagkalambigit kuno sa mga iregularidad.
Unang nanawagan ug suporta si PNP Chief, Police General Rommel Francisco Marbil sa kapulisan nga naglisod sa pag-atubang sa ilahang mga kaso sa war on drugs sa Duterte administration.
Samtang gipahayag usab ni PNP Public Information Office Chief, Police Brig. Gen. Jean Fajardo, kasagaran sa mga nahisgutan ang nagkinahanglan ug legal nga suporta o abogado aron makapadayon ang kaso.
Sa pag-atubang sa kanhi pangulo sa ika-11 nga pagdungog sa Quad Committee sa Kamara, gipahayag niini nga dili angay tuhuan ang gihimong pahayag sa kasamtangang hepe sa PNP.
