Nagluwat og pamahayag si Pangulong Ferdinand Bongbong Marcos Jr., labot sa mga gipangbutyag nga mga pulong ni kanhi Pangulong Rodrigo Duterte, atol sa gipahigayong pagdungog sa Quad Committee niadtong adlawong Miyerkules.
Sumala pa niini nga ilaha matud pang lantawon og aduna bay mga angay nilang tagaan og panahon nga imbestigahan ang mga nahimong pamahayag sa kanhi Pangulo, labot sa extrajudicial killing ug uban pa.
Samtang, gikumpirma sab ni Department of Justice Secretary Jesus Crispin Remulla nga gisugdan na matud pa sa gimugnang Task Force on Extra Judicial Killings ang pagpahigayon og imbestigasyon sa war on drugs sa nakalabayng administrasyon.
Sa nahimong pamahayag ni Remulla, gikanayon niini nga nagapangita na matud pa karun og mga ebidensya ang maong pundok, aron nga masugdan na ang pagmugna og lig-on nga kaso batok sa mga personalidad nga nalambigit sa maduguong war on drugs.
Una nang gimugna sa DOJ ang Task Force EJK diin gitahasan niini si Prosecutor General Richard Anthony Fadullon ug ang mga opisyal sa NBI nga pangulohan ang maong imbestigasyon.
Isip kalakip sa maong imbestigasyon, laraw sab sa maong pundok nga makigkoordinar kini ngadto sa mga nahimong witness sa mga naunang mga pagdungog sa Senado ug Kamara sa nakalabayng administrasyong Duterte.
Samtang, gipaklaro sa DOJ nga sa karun, wala pay deadline nga ilahang ginasubay aron nga mahuman ang pagmugna og mga kaso nga ipasaka ngadto sa mga personalidad nga malambigit sa naasoyng isyu.
