Gipahimangnuhan ni Representative Bienvenido Benny Abante si kanhi Pangulong Rodrigo Duterte, nga kinahanglang dili kini mamalikas sa ilahang atubangan, samtang ginapahigayon ang pagdungog sa komite labot sa extrajudicial killings kaniadtong war on drugs sa nakalabayng administrasyon ni Duterte.
Sa laing bahin, sumala pa sa mga naminaw sa maong pagdungog nga daw namuyboy na si Abante ngadto sa kanhi Pangulo, diin gitataw niini nga siya matud pa ang nangusog nga ikampanya si Duterte kaniadtong midagan pa kini sa pagka-pangulo niadtong tuig 2016, apan wala kini nadawatan bisan pasalamat man lamang matud pa gikan sa kanhi Pangulo.
Milungtad usab og kapin 30 ka minuto ang nahimong opening statement ni Abante, diin gikanayon niini nga dili matud pa siya musugot nga mamalikas si Duterte, gumikan og kini maoy buhaton sa kanhi Pangulo, iyaha matud pang ipa cite-in-contempt.
Wala sab nalikayan sa maong magbabalaod nga mupadayag sa iyahang kasakit, human nga na-frustrate matud pa siya gumikan sa walay undang nga balikas ug pagpang-bash kaniya sa mga DDS vloggers diin miabot sa punto nga gikwestyon ni Abante og pila ba ka ihap sa ilahang napabotar kang FPRRD niadtong panahon sa eleksyon, gumikan makagarantiya matud pa siya sa iyahang kabahin nga libohan sumala pa ang iyahang naawhag nga mga tawo sa iyahang simbahan kaniadto nga ibotar si Duterte kaniadtong tuig 2016.
Hinuon, nahuman ang maong pagdungog nga walay natigayong pagpamalikas sa kanhi Pangulo.
Lakip sab sa gisulti ni Abante nga maayo na lamang nga buhi pa ang kanhi Pangulo, gumikan sa pagtawag niini ngadto sa Ginoo og stupid.
