Gibutyag ni Senate Minority Leader Koko Pimentel nga wala na matud pa kini laraw nga kinahanglang mutambong pag-usab sa musunod nga pagdungog si kanhi Pangulong Rodrigo Duterte labot sa gikaingong maduguong kampanya batok iligal nga droga.
Sumala pa niini nga og ugaling ang iyahang mga kaubanan sa Senado gusto pa nga kinahanglang patambungon pag usab sa pagdungog si Duterte, andam matud pa kini nga maminaw sa mga sugyot, apan sa pagkakarun matud pa, wala pa kini laraw nga patambungon pag usab ang maong kanhing Pangulo.
Si Pimentel maoy chairperson sa Senate Blue Ribbon Subcommittee, diin maoy naghatag og kahigayunan nga magpahigayon og pagdungog sa Senado labot sa mg ginaatubang nga mga isyu ug kontrobersiya ni Duterte kabahin sa gikaingong palpak matud pa nga war on drugs sa nakalabayng administrasyon.
Kahinumdumang niadtong nakalabayng pagdungog sa Senado niadtong adlawong Lunes, gibarugan sa maong kanhing pangulo nga dili gayud kini mangayo og pasaylo labot sa gikaingung maduguong gyera batok sa iligal nga droga, diin angkunon lamang niini ang tanang legal nga mga responsibilidad ug dili na matud pa maglambigit og si bisan kinsa pang mga indibidwal, partikular na kadtong mga personahe sa Philippine Natioal Police.
Samtang, nagtuo sab si Manila 6th District Rep. Bienvenido Abante nga liable for crimes against humanity si kanhing Pangulong Rodrigo Duterte. Gibutyag ni Abante nga angay nga manubag ang kanhing Pangulo sa mga nahitabong pagpamatay.
Mamahimong pasakahan ang kanhing Pangulo ug pagsupak sa Republic Act No. 9851 or the Philippine Act on Crimes Against International Humanitarian Law, Genocide, ug uban pang Crimes Against Humanity.
