Gibutyag ni VP Sara Duterte nga dili matud pa kabalo mudumala sa nasud si Pres. Ferdinand Marcos Jr. ug mamahimong ma-impeach sab kini pinaagi sa 5 ka impeachable offenses.
Gikanayon sab niini nga wala na unta kini laraw nga patulan pa ang maong Pangulo, gumikan mas mahinungdanon sumala pa ang pag-solbad sa problema sa mga nagkadaiyang mulo sa katawhan.
Sa pikas bahin, gisaway sab ni Duterte ang pagpang-ipit sa iyang opisina labot sa nagpadayong hearing sa confidential fund sa iyang buhatan gumikan wala matud pay makitang tama sa ginasulti sa resource speaker ug dili dawaton ang ginapresentang impormasyon ug dokumento sa komite, lakip na ang mga tubag sa Commission on Audit (COA).
Kahinumdumang nakurat ang house panel nga migasto ang OVP og P16 milyon nga renta sa 34 safehouse sulod lamang sa 11 ka adlaw, lakip na ang usa ka safehouse nga girentahan og halos P91,000 matag adlaw nga mas mahal pa sa high-end resorts susama sa Shangri-La Boracay gikan sa Disyembre 2-31, 2022.
Samtang walay bisan usa sa opisina sa OVP ang mitambong sa pagdungog, hinungdan nga ang gikwestyon mao si Atty. Gloria Camora, team leader sa COA unit nga nag-audit sa CIFs sa OVP niadtong 2023 ug gikwestiyon sab kini ni Sen. Risa Hontiveros og giunsa paggasto sa OVP ang ilang P16-M nga pondo.
Gumikan niini, giaprubahan sa Kamara ang pagpagawas ug subpoena adtestificandum batok sa unom ka mga opisyal ni VP Duterte nga napakyas sa pagtambong sa gihimong hearing sa Kamara.
Hinoon, gibutyag niini nga wa matud pa siya nagmahay nga nagteam-up sila ni PBBM gumikan ang iyang pagdagan isip bise, personal choice niini.
