Giaresto sa kapulisan sa Thailand ang drayber sa usa ka bus nga nagdala ug mga batang estudyante ug magtutudlo nga nasunog hinungdan sa kamatayon sa 23 sa Bangkok, hinungdan nga nahiabot sa capital ang pamilya sa mga biktima aron sa pag-ila sa ilahang anak nga nabiktima sa sunog.
Ang nahisgutang bus ang nagkarga ug unom ka mga magtutudlo ug 39 ka mga estudyante sa elementarya ug junior high school gikan sa Uthai Thani province, mga 300 kilometros ang gilay-on gikan sa north Bangkok nga mao ang kapital sa Thailand alang sa usa ka school trip.
Nahitabo ang pagkasunog sa bus samtang anaa sa highway sa norte nga bahin sa kapital ug dali-daling mikuyanap ang kalayo hinungdan nga daghan ang wala maka-eskapo.
Gipahayag sa head sa police forensic department nga mukabat sa 23 ka mga patay ang nakuha gikan sa bus ug nalangan ang recovery work gumikan sa kainit sa bus.
Matod pa sa drayber, nawad-an ug balansi ang bus hinungdan nakabangga sila ug kotse lakip na ang concrete highway barrier nga misangpot sa pagkasunog sa bus.
