DAVAO CITY- Mokabat na sa 27 ang nakabsan sa kinabuhi dinhi sa dakbayan sa Davao sukad niadtong Enero hangtod ning bulan sa Agosto.
Kini ang gibutyag ni Melodina Babante, ang labaw sa Tropical Disease and Prevention Unit.
Sa pagkakaron adunay kinsi ka mga barangay sa dakbayan ang gikonsidera nga hotspots tungod sa dengue.
Nasayran sagad sa nataptan sa maong virus ang nag-edad ug singko ngadto na sa nuybi anyos.
Sumala pa sa hingtungdan nga ahensya nga kasagaran sa mga natakbuyan sa maong sakit ang ulahi kini nadala sa ospital.
Sa pagkakaron, Dusi (12) lamang ka mga baranggay sa syudad ang nagpabilin nga dengue free sulod sa 182 ka mga barangay.
Gikanayon sab sa opisyal ning bulana miabot na sa 3,457 ang kaso sa dengue dinhi sa dakbayan.
Bisan ug milapas na sumala pa sa epidemic threshold ang maong ihap, wala modeklara ang syudad ug state of calamity.
Sigon sab sa opisyal nga ang ihap sa ga kaso ang nakasaka sa gitawag nga significant concern sa City Health Office diin sobra Katunga na ang natalang kaso hangtod ning bulana sa kinatibuk-an nga kaso sa miaging tuig nga anaa sa 6,000 ka mga kaso.
Ang mga barangay nga gikonsidera nga hotspots mao ang mga Barangay Talomo Proper, 76-A Bucana, Bunawan Proper, Buhangin, Tibungco, Panacan, Catalunan Grande, Mintal, Calinan Población, Toril Poblacion, Malagos in Baguio District, Maa, Matina Crossing,Catalunan Pequeño,ug Baliok.
Sagad sa mga apektadong baranggay ang adunay daghang lumulupyo nga dali sab nga makahatod ug pagkaylap sa maong balati-an.
Sa karon aduna na’y gihimong lakang mga opisyal sa nasampit nga baranggay sama sa hugot nga pag-edukar sa mga residente alang sa kasayuran mahitungod sa dengue prevention.
Samtang giawhag sab niini ang mga tagbalay nga magpahigayon ug “search and destroy” pinaagi sa pagyabo sa mga nagpondo nga tubig ilabi na human sa pagbundak sa ulan.
