Gisaway ni Manila 3rd District Rep. Joel Chua si Vice President Sara Duterte gumikan kay kanunay kini mawala ug magpakahilom sa higayong gikinahanglan kini sa Pilipinas susama sa mga panahon nga ginaipit ug gidaug-daug sa Chinese Coast Guard (CCG) ang mga sundalong Pinoy sa West Philippine Sea (WPS).
Gipahayag pa sa nahisgutang magbabalaod dili ikalimod nga naglikay ang bise Presidente sa mga isyu nga adunay kalabutan sa pagpangilog ug pagpalapad sa teritoryo nga gihimo sa China sa teritoryo sa Pilipinas.
Samtang ang amahan ni Sara nga si kanhi Pangulong Rodrigo Duterte ang na-ila nga haduol sa China gumikan sa pro-China policy.
Gikanayon pa sa magbabalaod, isip Bise Presidente, gikinahanglan lamang nga maka-Pilipino kini ug dili magpakahilom sa mga ginahimo sa China sa mga Pilipino.
Nangutana usab si Rep. Chua kung asa na ang Bise Presidente sa dihang mi-abot si Typhoon Carina, sa dihang mibuto ang Mount Kanlaon, mibusikad nga bomba sa Mindanao State University ug giigo sa El Niño ang mga palayan.
Nagpakahilom usab si VP Sara sa dihang gibuslutan sa China Coast Guard ang rubber boats sa mga pinoy ug gibanggaan sa dagat ang fishing boats sa mga mangingisda sa nasud apan nagpakahilom lamang ang Bise Presidente.
Niadtong panahon sa super typhoon Carina, si VP Duterte kauban ang pamilya niini ang mibyahe padulong sa Munich, Germany aron magbakasyon.
Dugang pa sa magbabalaod, gipaagi lamang ni VP Duterte sa paandar, pakwela ug mag-selfie aron matabunan ang kakulang niini sa pagpatuman sa mga katungdanan sa nahisgutan.
Gipahayag pa niini gipaila ni VP Duterte ang kaugalingon niini isip champion sa mga masa ginamit ang mga ampaw nga pagpamulong, samtang walay tinuod ug konkretong resulta nga mapakita isip ikaduhang Pangulo ug bisan kaniadto pa nga sekretaryo kini sa Department of Education (DepEd).
