DAVAO CITY- Mukabat sa kapin 11,000 ka mga security personnel ang ipakatag sa umalabot nga Kadayawan Festival ug Ironman sunod bulan, dinhi sa syudad.
Sa ihap nga gibutyag ni PCapt. Hazel Tuazon, tigpamaba sa DCPO anaa sa 11,111 ka mga kapulisan nga gikan sa ilang buhatan ang mobantay uban sa tabang sa nagkadaiyang ahensya susama na lamang sa Public Safety and Security Office, ug uban pang law enforcement agencies aron maseguro ang kaluwasan sa publiko.
Alayon niini, giawhag sa opisyal ang partisipasyon ug koordinasyon gikan sa publiko nga boot mosalmot ug mosuroy sa syudad.
Gitagaan og gimbug-aton ni Tuazon ang pagsunod sa mga ipatuman nga polisya aron malikay sa dili maayong mga insidente.
Tumong sa maong buhatan nga mahimong hapsay ug malinawon ang pagsaulog sa mga dagkong aktibidad hinungdan nga karon pa lamang, nagapangandam na ang DCPO.
