Dili ma-access ang pipila ka online services sa Department of Migrant Workers kon DMW human ang nahitabong ransomware attack kagahapong adlawa.
Miresulta kini sa temporaryong pag-offline sa online system sa ahensya aron maprotektahan ang datos ug impormasyon sa mga OFW. Lakip sa mga online services nga temporaryong paralisado mao ang electronic o online systems nga naga-isyu og Overseas Employement Certificate kon OFW passes ug OFW information sheets.
Ginapaningkamutan usa sa ahensya nga makipagtinabangay sa Department of Information and Communications Technology aron mabalik ang online systems.
GIkataho usab nga wala naapektuhan sa maong ransomware attack ang database nga aduay sulod nga mga datos sa mga OFW.
Samtang, alang sa mga OFW nga mokuha og OECs/ OFW pass, mamahimo matud pa nga muadto sa DMW National Office, Regional Offices ug Extension o bisan sa One-stop shops ug Migrant Workers Assistance Centers alang sa manual nga pagproseso sa maong mga dokumento.
Alang usab sa mga mokuha sa ilahang information sheets, mamahimong ipadala ang ilahang request pinaagi sa ilahang email nga infosheet@dmw.gov.ph o di kaha sa DMW facebook page messenger.
Nangayo og pasensya ang ahensya sa DMW sa kahasol tungod sa insidente ngadto sa mga OFW ug sa ilang mga sakop sa pamilya.
