DAVAO DE ORO- Malampusong giorganisar sa 10th Infantry (Agila) Division ang 1st Female Agila Patrol (AGPAT) Challenge sa tuig 2024 sa 10th Division Training School sa Mawab, Davao De Oro, gikan Hulyo 03 hangtod Hulyo 06, ning tuig kasamtangan.
Sumala pa nga adunay kinatibuk-ang 12 ka mga babaye sa Infantry Squads nga naggikan sa organic ug operational control infantry batallion sa 10ID ang misalnot sa upat ka adlaw nga kalihokan.
Gilangkuban kini sa nagkalain-lain aktibidad susama na lamang sa Troop Leading Procedure, Mountain Operation Search and Rescue (MOSAR), Tactical Combat Casualty Care, Improvised Explosive Device (IED) Detection, Knot Tying, Endurance Firing alang sa pistola ug rifle, Battle Drills, Map Reading, Land Navigation, Patrol Base Operation, ug uban pang military skill set.
Sumala pa ni 10ID Commander Major General Allan Hambala nga ang katuyoan sa maong aktibidad mao ang pagpauswag sa kaandam sa mga babaye nga sundalo pinaagi sa paglahutay ug pagtinabangay.
Kini matud pay maghatag og suporta ngadto sa mga babayeng sundalo pinaagi sa pagpasiugda sa gender inclusivity ug equality.
