DAVAO CITY- Wala giuyonan sa usa ka theologian ang laraw nga pagatanggalon ang K12 curriculum sa nasud Pilipinas.
Sumala pa ni Christian Coronado, usa ka theologian ug educator nga angay lamang ipadayon ang K12 curriculum sa nasud gumikan nahisubay kini sa international standard diin dakong tabang alang sa mga estudyante nga mahimong globally competitive.
Dugang pa ni Coronado nga walay mali sa maong programa gawas na lamang sa mga employers nga dili mohatag og kahigayonan sa mga nigradwar niini nga makatrabaho.
Alayon niini, gitagaan og gimbug-aton sa nahisgutan ang koordinasyon sa gobyerno ug private sectors aron matagaan og entry level positions ang mga nahisgutan inay permi na lamang college graduates ang kuhaon sa trabaho.
Gawas niini, daghanang mga skwelahan na usab ang nag-invest sa pagtukod og mga bag-ong building rason nga imposibleng paga-uyonan kini sa mga tulunghaan.
Mahimo sab matud pa nga problema ang dayong pagtanggal niini alang sa mga boot moskwela abroad, sanglit dili makonsidera nga international standard ang napulo lamang ka katuig nga pagskwela ayha mag kolehiyo.
Kahinumduman nga una nang gikabutyag ni PBBM ang pagsusi sa nahimong kontribusyon sa K12 sa kabataan tungod wala matud pa kini nahatag nga kabag-ohan.
Ning kasamtangan, malaumon ang nahisgutan sa pagtoon ug lalom nga pagsabot sa gobyerno kabahin sa nahisgutang curriculum aron dili sab masayang ang mga gipang invest sa nasud Pilipinas.
