DAVAO CITY – Giklaro ni Davao City Overland Transport Terminal (DCOTT) Manager Aisa Usop nga dili na bag-ong regulasyon ang no pick up scheme sa mga pasahero gawas sa terminal, kondili usa na ka ordinansa.
Gipatuman ang no-picking policy sa Land Transportation Franchising and Regulatory Board (LTFRB) ug adunay counterpart sa habig sa lokal nga kagamhanan.
Ang DCOTT Board nagpasa ug resolusyon nga isubli kining mga ordinansa ug ipatuman ang estrikto nga no-pick-up policy subay sa mga insidente sa pagpamomba nga naglambigit sa mga bus sa silingang mga probinsya ug munisipyo sa Mindanao.
Ang DCOTT, Southern Mindanao Bus Operator’s Association, ug ang security cluster kasamtangang nagtuon sa gisugyot nga mga stopover gawas sa mga terminal.
Ang mga operator sa bus adunay dakong papel sa pagpatuman sa ordinansa, ug ang mga residente usab adunay dakong papel sa pagkooperar sa pagpatuman.
Ang mga bus nga masakpan nga mosakay og mga pasahero mag-atubang og Php 5,000 nga silot sa unang paglapas, Php 10,000 sa ikaduhang paglapas nga adunay pahimangno nga kumpiskahon ang prangkisa, ug Php 15,000 sa ikatulong kalapasan dungan sa non-renewal sa ilahang prangkisa.
via || Bombo LJF
