DAVAO CITY – Nagpakatag og dugang personahe ug nakaalerto usab ang Task Force Davao human sa nahitabong pagpamomba sa usa ka bus sa Tacurong City diin adunay nakabsan og kinabuhi ug 11 ka indibidwal ang natalang samaran human nga mibusikad ang usa ka improvise explosive device kon IED ug lain pa nga 2 ka IED ang nadiskubrehan nga wala mibuto.
Gikabutyag usab sa Commander sa Task Force Davao Lt. Col. Darren Comia nga mas gipahugtan ang seguridad sa rehiyon sa Dabaw bisan pa man nga wala pa nahitabo ang maong insidente.
Sumala kang Comia, gidungagan usab ang mga personahe nga gipakatag sa tanang boarder control point aron nga makunhuran ang linya sa mga sakyanan nga nagasulod-guwa sa rehiyon, ilabi na nga umaabot na usab ang pagselebrar sa yuletide.
Usa sa mga kalihukan nga gipatuman mao ang pagsakay sa mga personahe sa TF Davao ngadto sa mga bus kon Bus Boarding Operations, visibility patrol ug foot patrol.
Sa pikas bahin, kahinumduman nga nagpagawas og kamanduan ang Davao City Police Office nga wala ginatugutan ang tanang bus drivers nga magpick-up kon pick-up policy og mga pasahero sa tanang bus stops aron nga mapailawom sa inspeksyon ang tanang bagahe nga dala sa matag pasahero.
Samtang, mihangyo ngadto sa katawhan si Comia nga makig-alayon gayod, mutuman ug iboluntaryo ang kaugalingon sa sumbanan aron nga makalikay og aberya.
via || Bombo Danica Baguio
