3 ka highschool student sa Davao de Oro, nasunog gumikan sa pakyas sa laboratory experiment

DAVAO CITY - Angol ang tulo ka mga studyante sa high school homan nga napaslot gumikan sa pakyas nga experiment sulod sa tulonghaan kagahapon pasado 11:28 sa kaudtohon. 

Nakaangkon og paso sa kalawasan ang tulo ka studyante sa Awao National High School sa Awao, Monkayo Davao de Oro homan nga mapakyas ang ilang gihimong experiment sa Science Laboratory. 

Sumala sa Principal nga si Horacio Lacia, nagpahigayon matod pa og Science Experiment ang ilang adviser nga gitawag nga “Water Cycle” isip kabahin sa ilang gitun-an nga leksyon. 

Kalit matod pa nga gidakop sa kalayo ang Flying Tiger Denatured Alcohol nga usa ka fuel sa lighter ug gamit sa industrial. Gituohang taas ang Combustible content sa maong sangkap nga nagresulta sa paspas nga pagkaylap sa kalayo hinungdan sa pagka angol sa 3 ka mga magtutungha. 

Gilayong gidala sa Montevista Provincial Hospital ang mga nahisgutan kinsa kasamtangan karong nagpaalim.