DAVAO CITY – Gihagit sa Police Regional Office XI ang mga school personnel sa Davao region nga magpahigayon og hugot nga monitoring sa ilang mga tumotungha aron mapugngan ang susamang bayolenting hazing rites nga gikamatay sa usa ka estudyante bag-ohay lamang.
Sumala kang Brig. Gen. Benjamin Silo, Jr., Police Regional Office – Davao director, dili lang unta pagpatuman sa istriktong palisiya kundi lakip na ang monitoring sa aktibidad sa mga estudyante pinaagi sa malahutayong communication ngadto sa mga nahisgutan ug sa mga student organization.
Aminado ang opisyal nga maglisud ang kapulisan sa pagpugong sa susamang aktibidad sanglit gakahitabo kini sulod sa tulonghaan. Hinuon gikatakdang makigtabo ang PRO XI sa nagkadaiyang tulonghaan sa rehiyon aron mas palapdon pa ang kampanya hitungod sa Anti-Hazing Law.
Kahinumdumang ning nakalabay’ng adlawng Domingo, patay na dihang narekober si August Ceazar P. Saplot, usa ka 4th year student sa College of Criminal Justice Education sa UM, homan nga nipailawom sa hazing initiation sa AKRHO Alpha Delta Chapter fraternity sa Upper Mandug, Buhangin District, Davao City.
Napasakaan na og kaso ang 14 ka frat members sa nalambigit sa maong krimen apan walo palang sa mga nahisgutan ang anaa karon sa kostudiya sa kapulisan ug padayong gipangita ang laing 6 ka mga responsably sa krimen.
