DAVAO CITY- Gipahimangnoan karon sa Davao City COVID-19 Task Force ang tanang mga Dabawenyo nga mas mahimong responsable taliwala paman sa gipatumang boluntaryo nga pagsul-ob og face masks sa outdoor areas subay sa gipirmahan nga Executive Order (EO) No. 3 ni Pangulong Ferdinand “Bongbong” Marcos Jr. kaniadtong Setyembre 12.
Gihatagan og gimbug-aton ni Dr. Michelle Schlosser, tigpamaba sa Davao City COVID-19 Task Force, ang kamahinungdanon sa pagbaton og responsibilidad.
Kahinumduman nga gitugutan na ang baluntaryo nga pagsul-ob og face mask sa open spaces ug non-crowded outdoor areas nga adunay maayong bentilasyon.
Apan ang mga dili fully vaccinated nga mga indibdiwal, senior citizens, ug immunocompromised individuals ang gi-awhag nga pabiling magsul-ob sa ilang mga face masks ug kanunay ipatuman ang physical distancing.
Gipaklaro sab sa EO 3 nga kinahanglan pa gihapong sulmagsul-ob og face mask sa mga indoor private or public establishments, lakip na sa public transport by land, air, sea, ug sa mga outdoor setting diin imposibleng mapabilin ang physical distancing.
