DAVAO CITY – Gisubay na karon sa otoridad ang uban pang motibo sa pagpusil patay sa usa ka babaye diin nahitabo kini sa Purok 4B Barangay Malagos ning dakbayan sa Davao.
Una niini, gilayong miresponde sa lugar ang mga sakop sa Baguio Police station sa lugar human ang nadawat nga impormasyon.
Sa ulahing imbestigasyon sa otoridad, samtang anaa sa tindahan ang biktima nga nailang si Vanessa Onde, residente sa nahisgutan nga dapit, kalit nga mibutho ang usa ka lalaki ug kalit kini nga gipusil tumong sa iyang nawong nga maoy hinungdan sa iyang hinanali nga kamatayon.
Gamit sumala pa sa suspetsado ang usa ka .45 caliber pistol.
Human ang insidente, paspas sab nga misibat ang suspek sa wala matino nga direksiyon.
Una ng nasayran gikan sa igsuon sa biktima nga ayha ang pagpatay, nakadawat na kini ug bahad sa kinabuhi.
Samtang usa sa giimbestigahan karun sa otoridad ang anggulo nga adunay kalabutan sa reklamo nga kasong Concubinage sa biktima sa Municipal Trial Court ingon man ang bikil sa yuta sa ka-live in niini.
Gipasalig sa otoridad nga palawman pa nila ang imbestigasyon arun nga daling mailhang ang mipaluyo sa krimen ug mahatag gilayon ang hustisya sa kamatayon sa biktima.
