DAVAO CITY – Mapasalamaton ang lokal nga kagamhanan sa mga mihatag ug suporta sa gipahigayon nga Part 4 sa “Bayanihan, Bakunahan” National Vaccination Days (NVD) nga nagsugod kaniadtong Marso 10 ug natapos kagahapong adlawa Marso 12, 2022.
Una ng gibutyag ni Davao City Covid-19 Task Force Spokesperson Dr. Michelle Schlosser nga nag-abli ang siyudad ug daghanang vaccination hubs atol sa tulo ka adlaw nga vaccination campaign.
Target sa maong aktibidad ang mga pediatric 12 hangtud 17 years old ingon man mga hamtong nga magpa-first ug second doses, missed doses, o booster shots.
Una na sab nga nasayran kang Schlosser, nga sa 1,278,322 ka mga fully vaccinated nga mga indibidwal, anaa lamang sa 16.80 percent o 214,765 ang nakadawat sa ilang booster doses.
Gipahinumdoman sab niini ang mga Dabawenyos nga magpa-booster shots ilabi na nga muhatag kini ug dugang nga layer sa proteksiyon arun nga dili musangpot sa kritikal ang kondisyon sa higayon nga matakdan ug Covid-19.
Kahinumduman nga nag-unang katuyuan sab sa Bayanihan Bakunahan nga mapugngan ang subling outbreak sa kagaw sama sa nahitabo karun sa Hong Kong nga nakasinate na sab ug surge sa Covid-19 cases.
