DAVAO CITY – Gibutyag ni Mayor Inday Sara Duterte-Carpio nga dili matud pa kinahanglan nga mutambong sa sulod sa simbahan ang mga katawhan alang sa misa de gallo gumikan mamahimo gihapon nga mupahigayon niini sa Live streaming sa nagkadaiyang simbahan sa dakbayan.
Kini alang sa mga katawhan nga anaa lamang sa panimalay.
Dugang sa mayor, mamahimo gihapon nga mutambong og Misa de Gallo apan 30 percent seating capacity lamang ang pwede maka pwesto sulod sa simbahan gumikan sa padayon nga hulga sa COVID-19.
Hinuon, gipaniguro sa Archdiocese of Davao nga hugot nila nga ipatuman ang health protocols kung ipahigayon na ang Misa de Gallo o simbang gabi sugod karong Disyembre 16 hangtud 24 ning kasamtangang tuig.
Sumala sa pamahayag ni Parochial Vicar Fr. Voltaire Dimol nga tungaon sa duha ang Misa de Gallo sa matag adlaw.
Alang sa unang misa, ipahigayon kini alas 4:30 sa kadlawon samtang alas 5:25 sab sa kadlawon ang ikaduhang misa aron malikayan ang panagtapok sa katawhan.
Gani, naka plastar na daan ang mga health protocols sa mga simbahan sukad nga gitugutan nga makabalik nga magpahigayon og misa sa syudad.
Apan, luyo sa gilugway nga General Community Quarantine (GCQ) ilang gipaniguro nga 30 percent lamang ang pwede makasulod sa simbahan.
Giawhag sab nila ang mga manimbahay nga mutuman sa protocols sama sa pagsul-ob og face mask, face shield ug social distancing.
