DAVAO CITY – Moabot sa kinatibuk-ang 143 ka mga kaso sa cybercrimes ang na-refer sa Cybercrime Unit sa Davao City Police Office niadtong tuig 2019.
Gibutyag ni Police Co. Noel Espinoza, hepe sa Regional Cybercrime Unit XI nga gikan sa 143 ka kaso sa cybercrime, 36 nga kaso niini ang napasaka na sa korte.
Nahisgutan usab sa opisyal ang dakong nahimo sa buhatan sama na lamang sa lima ka kaso nga miresulta sa pag-isyu og warrant of arrests, upat ka kaso sa entrapment operation, usa alang sa pagilbi og search warrant, ug duha ka joint operations kauaban ang WCPC unit sa national headquarters.
Dugang pa ni Espinoza nga karong tuiga, duha ka entrapment operations ang nahimo sa Davao International Airport kung diin tanang entrapment operation mao ang kalapasan sa Republic Act No. 9995 or the Anti-Photo and Video Voyeurism Act of 2009.
Gitino ni Espinoza nga matag usa mamahimong mabiktima sa cybercrime pinaagi sa identity theft. Ang ubang klase sa cybercrimes gilangkuban kini sa online libel, online scam, anti-photo and video voyeurism, identity theft, online threat, unjust vexation, extortion ug atm-credit card fraud.
Gibutyag usab niini nga ang ATM-credit card fraud mahitabo pinaagi sa tawag sa cellpone nga ginahimo sa nagtakuban nga empleyado sa usa bangko ug motanyag og credit limit sa usa ka credit card.
Pahimangno sa opisyal nga sa higayon nga makadawat og tawag, mas maayo nga moadto sa banko kung asa ang imong bank account.
Dili usab moahatag og bisan unsang personal information kalabot sa imong bank account sa usa ka caller.
