DAVAO CITY – Gibana-bana nga moabot sa kapin baynte ka mga balay ang na-ugdaw sa sunog nga nahitabo sa Purok 11, Barangay 8-A, Lower Madapo ning dakbayan sa Dabaw kaganinang buntag lamang.
Gikanayon ni Barangay captain Ariel Lagmay, halos tanang mga nasunugan ang walay naluwas nga mga gamit sanglit paspas ang pagkatag sa kalayo gumikan kay dikit-dikit ang mga balay ug gama lamang usab sa light materials.
Sa nakuhang impormasyon ni kapitan Lagmay, nagdula sumala pa ug kalayo ang mga bata ug gipang-dauban ang mga unas sa saging sa nahisgutang dapit.
Paspas nga mikatag ang kalayo hangtud nga gilamoy niini ang daghanang kabalayan sa nahisgutang barangay.
Kahinumduman nga niadtong Agosto 3 lamang niining tuig kasamtangan, nasunog usab ang nahisgutang barangay ug na-ugdaw ang dul-an 22 ka mga balay.
Sumala kang Kapitan Lagmay nga nalisdan ang kabomberuhan sa pagpasulod sa ilang mga firetruck gumikan sa kagamay sa dalan.
Gawas nga fire prone area, naila usab ang nahisgutang dapit nga flood prone area.
Samtang, wala usay nasalbar nga gamit ang 69 anyos nga si Nanay Cinderella Ronquillo kinsa adunay sakit nga arthritis.
Gikanayon niini, nga maglisud na siya sa paghipos sa ilang mga gamit gumikan sa iyang sakit hinungdan nga gisiguro na lamang niini ug luwas ang iyang kaugalingon.
Lakip sa nasunog ang iyang balay, 2 ka motor ug tindahan.
