DAVAO CITY – Patay na nga nahi-abot sa balay tambalanan ang driver sa canter truck nga nailang usa ka Raymund Arcenal, residente sa Visayan Village, Tagum City human mibangga ang gimaneho niini nga truck sa ACF bus pasado alas 11:00 kaganinang buntag, Mayo 19, 2019 sa Upper Kinukol, Brgy. Inawayan, Davao del Sur.
Nasayran gikan kang Police Corporal Jessie Jul, traffic investigator sa Sta. Cruz Municipal Police Station nga pinasikad sa ilang inisyal nga imbestigasyon nasayran nga paliko ang canter truck sa quarry site sa maong barangay, akto sab nga naglawig ang ACF bus nga gimaneho ni Jestony Ronda padulong sa Digos City hinungdan nga nagkabangga ang duha ka mga sakyanan.
Nadala pa sa ospital ang driver sa truck apan nakabsan sa kinabuhi. Hinoon, walay natalang samdam sa mga pasahero sa bus.
Gi-endorso na sa Sta. Cruz PNP ang driver sa bus samtang nagpadayon ang imbestigasyon sa maong panghitabo.
