DAVAO CITY – Patay ang usa ka construction worker human nga natumbahan ug konkreto nga poste sa telephone company nga nalukat samtang ginapahigayon ang road widening sa Barangay Suwawan, Baguio District dinhi sa dakbayan sa Davao.
Eksklusibo usab nga nasaksihan sa Bombo Radyo Davao ang panghitabo ug naila ang biktima nga usa ka Jayrel Diauna, 31 anyos, ulitawo, ug residente sa Gumalang, Baguio District.
Alas 3:00 ganinang hapon samtang gipahigayon sa usa ka construction company ang pagpalapad sa karsada sa nahisgutang lugar nahimong unstable ang poste nga telcos nga nalukat ug na-igo ang biktima nga daling nawad-an sa iyang panimuot.
Backhoe usab ang gigamit aron nga makuha ang biktima nga nadat-ogan tungod kay dili makaya pag arsa sa iyang kaubanan.
Dali usab nga gidala sa Isaac T. Robillo Hospital sa Calinan, sa dakbayan sa Davao apan gideklara kining dead-on-arrival.
Sumala usab kang Susan Diauna, inahan sa biktima nga breadwinner sa pamilya si Jayrel.
Milaum usab ang pamilya nga tabangan sila sa Algon Construction sa gasto alang sa haya ug lubong sa namatay nga construction worker.
