DAVAO CITY – Gibutyag sa New People’s Army nga ilang gipahamtangan ug “rebolusyonaryong hustisya” ang mag-amahan ug anak nga lumad sa Talaingod gumikan sumala pa sa paghimo niini ug grabe nga krimen batok sa rebolusyonaryong kalihukan ug sa katawhan.
Matud pa kang NPA Southern Mindanao Regional Operations Command spokesperson Rigoberto Sanchez, nga gumikan sumala pa sa mga nahimong pagpangabuso ug inhustisya nga gipatuman sa mag-amahan nga Mampaundag sa Talaingod , nakahukom ang mga rebelde nga ipatuman ang revolutionary justice nga dugay na matud pang gipangayo sa mga masa.
Kahinumduman nga ang pagpatay kang Datu Banadjao Mampaundag ug sa iyang anak nga si Jhonard Mampaundag nahitabo sulod mismo sa ilang panimalay sa Igang, Barangay Palma Gil in Talaingod, Davao del Norte diin misulod ang mga rebelde ug gipamusil ang mag-amahan.
Gitataw sab ni Sanchez nga luyo sumala pa sa nahimong apela sa mga paryente ug mga sibilyan sa komunidad, gipadayon pa gihapon ni Mampaundag ang pagtukod ug military detachment sa area ug gi-organisa ang Alamara forces alang sa counter-revolutionary ug anti-people operations.
Gitataw sab sa mga rebeldeng pundok nga nalambigit sumala pa si Mampaundag sa pagpamaligya ug mga luna ug umahan lakip na ang mga yutang kabilin ngadto sa mga non-Lumad buyers ug uban pang nagka-interes niini.
