DAVAO CITY – Duruha ka semana sukad nga gipahigayon ang simultaneous mass vaccination, nakatala sumala pa sa unang round ang lokal nga panggamhanan sa Sabayang Patak Kontra Polio ug 99.9 percent immunization coverage.
Ang nahisgutan nga ihap ang base sa consolidated oral polio vaccine (OPV) report sa City Health Office (CHO) sugod Oktubre 14 hangtud 27.
Nasayran nga kinatibuk-ang 185,186 gikan sa 186,864 ka bata nga edad zero hangtud 59 months old ang nabakunahan.
Gawas sa barangay health centers ug house-to-house visits, gipahigayon sab ang pagbakuna ug oral polio vaccine type 2 (OPV2) sa mga bata sa piling mga hospitals, simbahan ug tulonghaan nga mas nakatabang nga molapad pa ang coverage.
Sumala pa kang CHO technical division chief Julinda Acosta, nga samtang gihulat nila ang uban nga mga health centers nga mosumite sa ilang official report, wala na sila naglaom nga maangkon ang target nga 100 percent coverage sa dakbayan apan mapasalamaton pa gihapon sila sa positibo nga tubag luyo sa pagduha-duha sa pipila ka mga ginikanan.
Una ng nasayran nga kadtong mga bata nga adunay taas nga kalintura, pneumonia, ug uban pang kondisyon ang dili sumala pa tugutan nga mopailalom sa bakuna.
Gikanayong aduna pa gihapoy pipila ka mga ginikanan nga dili buot pabakunahan ang ilang mga anak gumikan sa pagtuo sa ilang relihiyon ingon man kahadlok tungod sa isyu sa Dengvaxia.
