Nag-apod-apod ang lokal nga panggamhanan sa Tarragona og cash assistance ngadto sa 800 ka mga benepisyaryo karong adlawa (Huwebes, Hunyo 4) ubos sa crisis intervention program nga gitawag og “Alalay sa Krisis.”
Matod ni Municipal Mayor Kaka Bulaong, gihimo ang maong programa dungan sa pagsaulog sa Ka’aNiYogan Festival ug ika-60 nga anibersaryo sa pagkatukod sa lungsod nga pagahimoon gikan Hunyo 12 hangtod Hunyo 18.
Gibutyag ni Mayor Bulaong nga kinahanglan unahon ang kaayohan sa katawhan sa dili pa ang mga kasaulogan ug kalihokan sa munisipalidad.
Gipasalig usab sa mayor nga magpadayon ang lokal nga panggamhanan sa paghatag og prayoridad sa panginahanglan sa mga lumulupyo, ilabina sa mga kabus ug mga sektor nga labing apektado sa nagpadayong socio-economic challenges.
Dugang pa niya, ang unang 800 ka mga benepisyaryo mao pa lamang ang sinugdanan sa mas lapad nga programa sa paghatag og ayuda, diin gilauman nga mas daghang residente ang makadawat og tabang sa umaabot nga mga bulan.
