Gipangdakop sa mga awtoridad ang pito ka mga lalaki ug nakumpiska sa usa ka utility vehicle nga punô og giingong smuggled nga sigarilyo atol sa usa ka hiniusang operasyon duol sa Gaisano Grand Citygate, Cabantian Road, Buhangin, ning syudad sa Davao.
Sumala pa ni Captain Hazel Tuazon, tigpamaba sa Davao City Police Office, nahitabo pasado alas 4:30 sa hapon human sa usa ka anti-smuggling operation ang nasampit nga operasyon.
Giila ang mga suspetsado nga sila alias: Ronald (44 anyos, taga General Santos City)Abdulnasjer (26, taga Koronadal City) Abdulkadir (39, taga Maguindanao)Mohammad (22, taga Koronadal City) Anwar (40, taga Sarangani Province)Nadzrodin (24, taga Maguindanao) ug Norhamsam (31, taga Sultan Kudarat).
Ang operasyon gihimo sa mga personahe sa 5th Special Operations Unit ug Davao Intelligence Team sa Maritime Group, pinangulohan ni Staff Sergeant Norish Ervin Umacob, uban ang Buhangin Police Station nga gilangkuban ni acting station commander Major Clarian Dave S. Toboso.
Samtang sa laing bahin nakumpiska usab ang utility vehicle nga adunay plaka nga UCJ 657 nga gikargahan og wala pa matino nga kadaghanon sa smuggled nga sigarilyo.
Ang mga nadakpan ug ang mga ebidensiya karon anaa na sa kustodiya sa Buhangin Police Station.
Atubangon sa mga suspetsado ang kasong paglapas sa Republic Act No. 10643 o ang Graphic Health Warnings Law, nga sagad gamiton batok sa mga nag-apod-apod og ilegal ug walay buhis nga tabako.
Gipahayag ni Tuazon nga ang maong kalampusan kabahin sa padayon nga kampanya sa mga lokal nga otoridad batok sa pagkaylap sa ilegal nga tabako sa dakbayan sa Davao ug sa tibuok rehiyon.
