DAVAO CITY- Nadakpan ang giisip nga usa ka High Value Individual ug ika-lima sa listahan sa dakbayan nga tigpayuhot ug iligal nga droga atol sa gilusad nga drug buybust operation sa mga operatiba sa Bunawan PNP.
Subay sa report gikan sa mga otoridad, pasado alas nuybi ang takna sa buntag gipahigayon ang operasyon sa Purok 4 Upper Ilang, ning syudad sa Davao nga miresulta sa pagkasikop kang alias “JAK” ug kauban niini nga si alias LUISA.
Nakumpiska sa mga dinakpan ang usa ka dakong pakete sa iligal nga droga kon shabu nga adunay gibana-banaan nga kantidad nga mokabat sa Php.37,196.
Nakumpiska sab sa mga dinakpan ang keypad nga cellphone nga gigamit sa transaksyon samtang narekober ang buybust money nga kabahin sa gipahigayon nga transaksyon.
Sa karon ang mga dinakpan ang gikustudiya na sa Bunawan PNP ug pasakahan karong adlawa ug kasong pagsupak sa RA 9165.
Samtang sulod lamang sa nakalabay nga 24-oras lima ka mga Anti-Illegal Drug Operations ang gipahigayon sa kapulaisan sa dakbayan sa Davao, nga miresulata sa pagkasikop sa puto ka mga nalambigit sa iligal nga droga ug nakumpiska ang Php 186,864. nga standard drug price niini kung diin sa Sta. Ana PNP adunay Php 5,712. ang nakumpiska samtang sa Bunawan PNP ang adunay Php 66,028, sa PS8-Toril adunay mokabat sa Php4,760. nga iligal nga droga ang anakumpiska ingon man sa PS17-Baliok nakakumpiska ang mga otoridad ug Php 110,364.nga kantidad sa iligal nga droga. Sa karon maspakusgan pa sa kapulisan ang ilahang kampanya batok sa iligal nga droga dinhi sa dakbayan subay kini sa pagdeklara nga gyera batok iligal nga droga dinhi sa syudad sa Davao.
