Giandam na sa Philippine Crop Insurance Corporation kon PCIC ang mokabat sa ₱36 million nga insurance payout alang sa 5,005 ka mag-uuma nga nadaot ang mga pananom tungod sa Bagyong Luis, Maymay ug habagat gikan Agosto 1 hangtod 11.Matud sa Department of Agriculture, anaa sa ₱35.67 million ang unang gibanabanang insured damages sa unom ka rehiyon.
Pinakadaghan ang naapektuhang mag-uuma sa Central Luzon nga adunay 1,836, gisundan sa Region I nga 1,218 ug Region IV-B nga 836.Pinakadako ang kadaot sa palay nga mikabat sa ₱25.60 million, gisundan sa high-value crops nga ₱3.73 million ug mais nga ₱3.55 million. Gimobilisa na sa PCIC ang ilang regional offices aron paspason ang validation sa kadaot ug pagproseso sa insurance claims.
Matud ni Agriculture Secretary Francisco Tiu Laurel Jr., importante nga dali matabangan ang mga mag-uuma ug mangingisda human sa kalamidad aron makabalik dayon sa panginabuhi.Gipahayag usab ni PCIC President Jovy Bernabe nga gigamit na nila ang bag-ong teknolohiya aron mapaspas ang assessment ug pag-release sa tabang.Hinuon, mahimo pang mausab ang unang datos samtang nagpadayon ang field validation.
