ZAMBOANGA CITY – Kabsan sa iyang kinabuhi ang usa ka 3-month old nga baby human nga maanod gumikan sa hilabihang pagbaha sa Zamboanga niadtong milabay nga adlawng Lunes, Oktobre 21 ning tuiga.
Subay sa report, residente sa Purok 5, Lampoon ang pamilya sa biktima diin ang mga panimalay sab ang gihapak og kusog nga balod gumikan sa epekto sa bagyong Kristine.
Gani, 26 na ka pamilya kon katugbang sa 80 ka mga indibidwal ang gipahikling sa Barangay Patalon human nga maguba ang kabalayan sa mga residente gumikan sa kakusog sa balod.
Samtang, 5 ka tawo ang kasamtangang nagsaka sa ilang mga paryente human nga midahili ang yuta sa KM15, Barangay La Paz.
Hinoon, gilayon sab nga mitunol ang CSWDO og tabang sama sa bugas, delata, noodles ug uban pang food supplies sa mga apektadong residente.
Sa karon, padayon pa nga ginapangita sa mga rescuers ang bata aron mahatagan og disenteng lubong.
