Mireklamo si kanhi Executive Secretary Salvador Medialdea sa gibutyag nga datos sa human rights lawyer nga si Atty. Chel Diokno sa ihap sa mga nangamatay sa war on drugs sa administrasyong Duterte.
Sa gihimong pagdungog sa House Committee on Human Rights, gipakita ni Diokno ang extended resolution sa Supreme Court nga nakabutang accomplishment report gikan sa Office of the President diin migawas nga mukabat sa 20,322 ka mga indibiduwal ang napatay sulod sa mosobra sa usa katuig lamang o gikan sa July 1, 2016 hangtod November 27, 2017.
Mukabat sa 3,967 niini ang nagagikan panahon sa police operations.
Gibutyag usab ni Atty. Diokno nga 16,355 niini ang homicide cases nga gideklarang deaths under investigation nga gipatay kuno sa riding in tandem sukad sa July 2016 hangtod September 2017.
Gihulagway sa abogado ang gidaghanon sa napatay nga kayang pun-on ang Mall of Asia Arena apan ang nakabalaka gumikan kay duha lamang ang naaresto ug nakasuhan ug 52 ka mga kaso ang giimbestigahan.
