DAVAO CITY – Patay ang duha ka mga tulisan human misukol sa kapulisan kaganinang kaadlawon lamang.
Sa pakighinabi sa Bombo Radyo, gikanayon ni Police Major Melvin Joseph Violan, station commander sa San Pedro Police Station, misukol ang duha ka mga suspek hinungdan nga napugos usab ang mga police sa pagbalos nga miresulta sa kamatayon sa mga nahisgutan.
Alas 3:30 sumala pa kaganinang kaadlawoin sa dihang gitulis sa mga suspek ang biktima nga si ELIAS BUGSY GARCIA MAUSO, 20 anyos, taga 154 Ostrich Street, Marfori II Subdivision, Brgy. 9-A, ning syudad samtang pauli na unta gikan nagkaon.
Nakuha sa mga suspek gikan sa iyang posisyon ang iyang pitaka nga adunay sulod nga P900.
Paspas nga misibat ang mga suspek nga nagsakay og itom nga motorsiklo.
Dali usab nga nagpakitabang ang biktima kang Brgy. Capt. Tata Llubit nga mitawag og police.
Sa gilusad nga follow-up operation sa kapulisan, nasiplatan ang motor ug ang duha ka mga lalaking sakay niini nga sama sa paghulagway sa biktima hinungdan nga gisita kini sa nagpatrolyang kapulisan.
Apan mipasutoy sa ilang motor ang mga suspek hinungdan nga natigayon ang ginukdanay hangtud nga na-corner sila sa may Emerald St. Marfori diin nahitabo ang pinusilay.
Nadala pa sa SPMC ang duha ka mga suspek apan susama na silang gi-deklara sa mga doktor nga dead on arrival.
Naila ang usa sa mga tulisan nga napatay nga si Rogelio Wenceslao, taga New Loon Mintal ning syudad, samtang pabilin pang Mr. X ang kauban niini.
Narekober sa kapulisan gikan sa posisyon sa napatay nga mga suspek ang usaka revolver, kutsilyo ug mga pinaugang dahon sa marijuana.
