DAVAO CITY – Gikumpirma sa Police Regional Office in Davao (PRO 11) nga tulo ka mga low-ranking police officers sa rehiyon ang napaksahan ug kasong administratibo human nga nalambigit sa ginadili nga droga atol sa unang first quarter ning tuig kasamtangan.
Sumala pa kang Police Major Jason Baria, tigpamaba sa PRO 11, nga nagpositibo ang mga nahisgutan sa gipahigayon nga random drug test.
Hinuon wala na niini, gihinganlan ang mga badlungon nga pulis ug kung asa kini nga unit.
Sukad 2017, kinatibuk-ang 12 ka mga pulis ang napasakahan human nga nalambigit sumala pa sa ginadili nga droga. Sa nahisgutan nga ihap, unom niini ang na-dismiss sa serbisyo.
Sa tuig 2017, adunay upat ka mga pulis ang nalambigit sa illegal drugs, lima niini sa 2018 ug tulo sukad Enero hangtud Marso ning tuig kasamtangan. Nasayran kang Baria nga kadaghanan sa mga nalambigit mga low ranking police officers.
Sukad Enero 1 hangtud Marso 31 ning tuig kasamtangan, 48 ka kaso ang ilang naduso gumikan sa nagkadaiyang salaod nga nahimo diin upat niini ang naresolba.
Gipahugtan karon sa kapulisan ang ilang kampanya batok ginadili nga droga isip tubag sa kampanya ni Pangulong Rodrigo Duterte sukad nga milingkod kini sa iyang katungdanan.
