DAVAO CITY- Dili na mahimong gawasnon karong adlawa ang duha ka mga indibidwal human nga nababagan sila sa ilahang pagbyahe pasulod sa dakabyan sa Davao atol sa gipahigayon nga checkpoint tungod sa paghupot ug armas ug iligal nga droga.
Subay sa report gikan sa kapulisan, pasado alas kuatro ang takna kaganihang kaadlawon gipahigayon ang PNP/TF Davao Fixed Check Point sa Brgy. Licanan, Lasang, ning syudad sa Davao nga miresulta sa pagkasikop sa duha ka mga wala panganling indibidwal sa kapulisan nga nakuhaan ug .45 caliber pistol nga adunay tulo ka mga magazine ug mga bala, samtang nakumpiska sab ang usa ka improvised .45 pistol nga adunay usa ka magazine ug lima ka mga bala.
Sumala pa sa mga otoridad nga gawas sa mga armas ug bala nakumpiska sab sa mga nahisgutan ang mga putos sa pinauga nga dahon sa MARIJUANA, nga adunay standard drug price nga mokabat sa Php.3,852.
Gikumpiska sab sa mga otoridad ang usa ka sakyanan nga Toyota Vios nga gigamit sa mga suspetsado nga karon anaa sa konstudiya sa kapulisan.
Pagsupak sa RA 9165 ug RA 10591 ang patong-patong nga kaso nga atubangon sa wala panganli nga mga suspetsado nga karon tingkagol sa kapulisan sa Bunawan.
