DAVAO CITY- Sikop ang usa ka 18 anyos nga lalaki human nga nakuhaan og usa ka pakete sa gituohang pina-ugang dahon sa marijuana atol sa buy-bust operation nga gipahigayon sa Tugbok Police Station sa Corner Atis St. Purok Saloy, Brgy Sto Niño, Tugbok District, ning dakbayan sa Davao.
Giila ang suspek nga si Justine Paclib Almeron alyas Dodong, 18 anyos, ulitawo, ug residente sa Purok 21, Small Village, Brgy. Mintal, Tugbok District.
Sumala pa sa station commander sa nasampit nga istasyon nga si Police Major Michael Salve Uyanguren, gidakop ang suspek human nga napalitan sa usa ka pulis nga nagpakaaron-ingnon nga buyer og usa ka pakete sa gitouhang pinaugang dahon sa marijuana nga nagkantidad og P200.
Subay sa operasyon, sa pagrikisa sa kapulisan, lain pang lima ka pakete sa maong illegal nga droga ang nakuha gikan sa suspek.
Gani, balhug sa prisohan ang suspek og nag-atubang og kasong paglapas sa RA 9165.
