DAVAO CITY – Dakpan ang unom ka mga armadong lalaki human sa gipahigayong hot pursuit operation sa mga otoridad human sa nahitabong shooting incident sa Purok Sto. Niño, Pagsabangan Tagum City kagahapon sa gabii kung diin usa ka security guard ang angol ug anaa sa kritikal nga sitwasyon human nga misukol kini og pinusilay sa mga suspek nga misulay sa pagsulod sa balay sa CEO sa usa ka investment scam.
Ang biktima nailhang si Rommel Ayala, 48 anyos, minyo, residente sa Sto. Tomas, Davao Del Norte.
Subay sa imbestigasyon sa kapulisan, kalit matud pa miabot ang mga suspetsado dayun namusil apan nakasukol matud pa ang biktima hinungdan nga misibat ang mga suspetsado sakay sa ilang get away vehicle.
Swerte na lamang nga dali dayong mi-responde ang unit sa mobile force batallion sa PNP ug nasikop ang mga suspetsado sa checkpoint sa Pagsabangan highway.
Ang mga suspek giilang sila Reynald Pelong Pangan, 41 anyos; Ramil Lariosa Generale, 51 anyos; Jhon Paul Dicipulo Padios, 23 anyos; Francisco Arresgado Sayon, 26 anyos; Euticano Doromol Putente, 61 anyos ug Arnold Pacatang Capoy, 48 anyos.
Nakuha sa ilang posisyon ang usa ka Elisco M16, Colt M16, long magazine, .45 caliber Armscor, .45 caliber Firestorm ug mga bala.
Sa pagkakaron, gipalawman na sa otoridad ang ilang imbestigasyon aron sutaon kung aduna ba kini kalambigitan sa nahitabong pagpangransak sa mga investment schemes sa Dakbayan sa Tagum.
