DAVAO CITY – Gideklara na sa Davao City Health Office nga nakasinati karon og Diarrhea outbreak ang Toril District ning syudad sa Davao diin anaa sa dul-an 50 ka mga pasyente na ang nakasinati og acute gastroenteritis.
Gikumpirma sa hepe sa Davao CHO nga si Dr. Ashley Lopez nga anaa sa 12 ka mga baranggay ang apektado niini.
Gilangkuban kini sa mga Barangay
Bato
Toril Proper
Crossing Bayabas
Lubogan
Mulig
Daliaon Plantation
Tungkalan
Daliao North
Daliao South
Lizada Fish Port
Lizada Kurbada
Binugao
Nasayran nga niadto pang Hulyo 15 nagsugod ang outbreak ug mas mi-doble pa ang ihap sa mga pasyente nga na-admit sa mga pribadong ospital niadtong Hulyo 16.
Gumikan niini, gilayon nga nagpahigayon ang maong buhatan og imbestigasyon sa nahisgutang mga areas aron masuta unsay hinungdan sa maong insidente.
Dugang pa ni Dr Lopez nga anaa sa 43 ka kaso ang natala diin pinakabatang pasyente mao ang usa ka 6 months old na masuso ug ang pinakatigulang mao ang anaa sa 40 anyos.
Ginapaabot pa karon ang resulta sa ginapahigayong water sampling gumikan usa sa gidudahan sa publiko mao ang water system sa maong area ilabi pa nga sagad ang nasinatiang pag-ulan ug pagbaha niadtong nakalabay nga mga adlaw dinhi sa syudad.
Gawas niini, dugang pa ni Dr. Lopez nga gawas sa water sources, lakip sab sa ilang gina-imbestigahan karon mao ang ginabaligya nga street foods partikular na ang tapioca diin subay na sab kini sa nahimong pahayag sa mga pasyente. Ning kasamtangan, nagpadayon pa karon ang ginahimong imbestigasyon sa Davao CHO.
