DAVAO CITY – Gisaulog ang World Day Against Child Labor diin gipahigayon kini sa usa ka dakong tulonghaan sa Davao City.
Gilusad ang maong aktibidad pinaagi sa Department of Labor and Employment – Davao City Field Office, ug sa Special Office for Children’s Concerns (SOCC) sa City Government of Davao ug Project Angel Tree Community Establishments.
Sa maong adlaw, usa ka gatus ka mga working children ug ilang mga ginikanan nga gikan sa mga barangay sa Agdao Proper, Barangay 78-A Bucana, Matina Pangi, Isla Verde, ug Lubugan ang nakasalmot sa mga padula ug mga pahalipay.
Aduna sab mga papremyo ang gipanghatag sama sa cellphones, appliances ug sanina.
Nakadala sab sila og usa ka sakong bugas pagkahuman sa programa.
Sa pakighinabi kang SOCC Head Consorcia Ronquillo, usa sa tumong sa maong event nga ma-enjoy sa mga working children ang ilang pagkabata ug awhagon sila nga magpokus sa mga kalihokan sa edukasyon bisan pa sa sayo nga pagsulod niini sa kalibutan sa pagtrabaho.
Gikanayon pa ni Ronquillo nga gipaningkamutan nila nga mamenosan ang kaso sa child labor diri sa dakbayan pinaagi sa paghatag og g edukasyon sa mga bata.
Bisan paman kadaghanan sa mga kaso sa child labor ang boluntaryo—diin ang mga bata andam nga mangita og usa ka matang sa trabaho o tinubdan sa kita aron makatabang sa pagpatunhay sa ilang pamilya sa pinansyal nga paagi—ang SOCC Head miingon nga ang mga ginikanan kinahanglang ilikay ang ilang mga anak gikan sa makadaot nga epekto sa child labor nga dad-on sa batan-ong mga hunahuna ug sa mga bata sa umaabot.
Sumala kang DOLE Davao City Field Office Senior Employment Officer Lariele P. Arce, kapin 4,800 ka mga bata sa Davao City ang nalambigit sa child labor niadto pang 2018.
Gawas niini, 1,200 na ang na-withdraw sa listahan isip working children ug kasamtangang anaa sa 2,500 na ang nakadawat og mga hinabang ug educational grants.
Nakatala og 556 ka mga working children ang Davao City sa unang bahin sa 2022.
Via || LJ Florendo
