DAVAO CITY – Tungod sa sunod-sunod nga mga linog nga natala sa milabay nga bulan sa pipila ka parte sa Mindanao nga mihatud ug kadaut sa mga tulonghaan, laraw karon sa Department of Education Davao Region (Deped-Davao Region) nga magpahigayon ug weekly disaster drills sa tanan nga mga eskwelahan.
Sumala pa kang DepEd-Davao director Evelyn Fetalvero nga magpagula siya ug memorandum circular nga kinahanglan himuon ang weekly drill sa nagkadaiyang eskwelahan aron nga makapangandam ang mga estudyante lakip na ang mga teaching ug non-teaching personnel sa mga angayan nga himuon panahon sa kalamidad sama na lamang sa linog, tsunami, sunog o bomb-explosion.
Plano sab nila nga pun-an ang kakulangon og hard hats nga required ilalom sa Department Order 37 o Comprehensive Disaster Risk Reduction and Management in Basic Education Framework.
Gi-angkon sa opisyal nga dili tanan nga mga tulonghaan ang adunay standby hardhats sa ilang tagsa-tagsa ka mga eskwelahan.
Samtang suportado sab ni DepEd-Davao Region education support services division chief Warlito Hua ang pagpahigayon og mandatory drill ug gani pipila na matud pa sa mga tulonghaan sa rehiyon ang nagapahigayon niini.
